Racconti e poesie

Racconti brevi, aforismi e poesie scritti da autori biellesi

LA STRA’

marzo2018

Tutun d’sa lumascëta
ch’a va da fiòr a n’ fòja
për tuta la sua ëstà
strusand la sua casëta,
mi sèguit la mia strà
tirandme dadaré,
tanme ‘na groja
ëntortojà ‘d pensé,
‘n po’ d‘ tëma,
‘n poc ‘d goja
pensand a tucc ij mé.
Tanme s’na strà ‘d montagna
la ment l’ha dij viron
mësciànd n’ërcòrd ch’a soagna,
quaij blaga e quaij magon,
face con scére brute,
face con bej soris.
Dinta st’avlupp ij ho tute
ij face d’ij me amis.
Long tuta la mia strà
nen mac foje e fior bej,
quëic vira ij ho trovà
d’j ortije e dij rovej.
Con tut, për ës sënté,
vag un po’ nech , ma viv:
Quand ch’ëm sentrù ciamé,
dsirù : « Son chi ch’j riv ».

Luj 2008 –  Gigi Vaglio – luisdivaj@libero.it

Premià al IV Concòrs Literare ëd Moncravél 2016
Sess.= Poesia – Prima participassion
Motivassion: Vera poesia carià ‘d sust e ‘d dosseur ch’anciarma.
Un poeta ch’a sara l’inventari ‘d sua vita për esse pront a dene cont.

MOMENT

marzo2018

I j’ho ‘nco sempe chi,dëdnans a j’eucc
sël sënté len dël Camp ver l’alp Castlëtt
cola matin ‘d novembre carià ‘d frëcc.
Dëdré na svolta strencia, ‘me ‘n quadrëtt,
j’ho vist la volp,ver mi,nen tant lontan,
ch’a l’ha vardame un colp,’me dime:”E ti
que ‘t fè su pë ‘sti bonde sòl ‘me ‘n can?”
Peu l’è sautà ‘nt ij scëppe e l’è sparì.

N’aut dì,a l’alp Fontan-e,me amis Pero
ch’a viagia fòrt sël dricc tamme ‘na crava,
a l’ha fërmasse ëd colp.Da ‘nte ch’i j’ero
s’ëvghia ‘n bel camoss,frëm,ch’al rumiava
quatà slë sion,tranquil ‘me dint ël dòm.
‘Me ch’a l’ha vist-ne,ëd colp l’ha ‘lvassi su
e l’è partì ‘me ‘l vent vers ël Bonòm,
con quat sauton p’ij creus e i j’ho vistlo pu.

‘L cravieu che su pl’Irogna p’un bel tòc
a l’ha vardame fiss,là,frëmm ‘me n’ròc.

La vipra ‘n mes ij flecc,s’arvira,’m soffia ‘dòss
pianin peu ‘s distortoja e la sguja giù p’ un fòss.

Dëdré dal tronch d’un pin am dòcia lë scureu
peu ‘l sauta su p’ij branch ‘me l’èissa dinta ‘l feu.

Son dijë strascëtt
ëd vita,ognun na storia,
a son dij cit quadrëtt
pëndu s’la mia memoria.

Otòber 2003 –  Gigi Vaglio – luisdivaj@libero.it
1°Premio al concorso di poesia “Le vite della montagna” 2017
Circolo “Stella” a Sassaia di Campiglia Cervo

J AGN

novembre2014

J ho vist ël mond cambié.
‘N cà dij me vecc
j dovravo ‘nco ‘l chinché
dëdnas lë specc,
p’ërdobié
l’lum a petrolio.
‘Dess aj è
ën gir da nòcc,
gran fari a lèd
d’ automòbil a gasolio.
Mi j ho ‘mparà a comuniché
vardand ben la gent ën facia,
ò scrivend con piuma e inciost,
pur fasendje quaiche macia.
‘Dess s’ëscriv da ‘n tucc ij post,
basta avej ij die svicce
e ‘n telefonin dispost.
E tegnend j orëgge dricce
‘t peu savej da tut ël mond,
neuve bo-ne,neuve grame,quai’dispet,
s’ët è bon,ma fi-na ‘ fond,
gabogné con Internet.
‘T peu parlé con tanta gent,
fin-a cola ‘n paradis,
peu ,‘t van subit da la ment,
parchè t’è mai vistje ‘l vis.
Mi, i son ho rivà fin’ chì
dòpo quai’tribulassion,
quaich maleur j l’ho patì,
pura sensa d’i gran dagn,
con fortun-a, ‘d vòte tanta
‘M resta ‘mè ‘na sensassion,
da nen ‘vei vivune otanta,
ma otscent ëd costi agn.

Otober 2014-10-07 –  Gigi Vaglio – luisdivaj@libero.it
  • biella
    Tutte le poesie e i racconti sono forniti dai rispettivi autori o da chi ne è autorizzato. Nessun uso di esse può essere fatto senza autorizzazione. Sono inserite opere scritte da persone che vivono o che sono originarie del biellese. Tutti possono partecipare inviando una mail a biellaclub@gmail.com con: nome e cognome (o pseudonimo), e-mail da pubblicare (o eventuale link internet), testo di almeno due opere. - Sono pubblicate da 2 a 7 opere per ogni autore.